Vaxandi bókasafn

Hugmynda- og teiknismiðja

Lóa Hlín Hjálmtýsdóttir myndlistarmaður og rithöfundur mun leiða hugmynda- og teiknismiðju fyrir áhugasama á öllum aldri. Í smiðjunni verður ímyndunaraflið virkjað með einföldum aðferðum og hversdagurinn notaður til að skapa eitthvað alveg nýtt. Þátttakendur þurfa ekki að mæta með neitt nema mögulega forvitni og/eða ögn af áhuga. 

Í smiðjunni ætlum við að búa til einfaldar bækur og hægt og rólega munu bækurnar mynda bókasafn.

Þegar ný tegund af bók er búin til, opnast sjálfkrafa ný deild á bókasafninu. Dæmi: amma býr til sögu um hryllilega drauga. Draugasögudeildin verður samstundis til á litla bókasafninu og þá getur næsta manneskja ákveðið að gera sína eigin draugasögu eða kannski bara opna allt öðruvísi deild.

Á meðan verkefninu stendur verður að heimsækja á bókasafnið. Þegar því er lokið mega þau sem vilja eiga sínar bækur og fara með heim eða leyfa bókasafninu að standa með möguleika á að bæta við það um ókomna tíð. Samfélagið mun þá eiga sitt eigið bókasafn með bókum fólksins.

Lóa Hlín er löngu landsþekkt fyrir teiknimyndir sínar og bækur auk þess að vera meðlimur hljómsveitarinnar FM Belfast. Hún mun vinna að bókagerð með hverjum þeim sem taka vill þátt. Lóa hefur áhuga á að vinna með íbúum Norðurþings, ungum sem öldnum, heyra sögur, slúður og annað sem ratað getur í bækur sem þátttakendur búa til undir hennar handleiðslu.

Smiðjan er samvinna Óld Skúl og Skúlagarðs.